BILJNI SVIJET
Vodene biljke
Biljni svijet Nacionalnog parka Skadarsko jezero je veoma bogat i raznovrstan. Jezero duboko zalazi u Zetsku ravanicu, te je sjeverna obala plitka, plavna i gusto obrasla močvarnom vegetacijom, vrbovim šumarcima i poplavnim livadama.
Vodena, posebno močvarna vegetacija, prepoznatljivo su obilježje Skadarskog jezera. Najpoznatije i populacijski najbrojnije flotantne močvarne vrste, bijeli i žuti lokvanji i kasoranja, tokom ljetnjih mjeseci prekrivaju velike vodene površine. Na njih se nadovezuju, takođe, prostrane i guste, u mnogim djelovima neprohodne populacije trske i rogoza (emerzne biljke).
Ispod vodene površine žive i biljke koje su cijele potopljene u vodi, kao što je na primjer mjehurača (submerzna biljka). Ove biljke zajedno sa algama prave podvodne livade, u kojima hranu i skrovište nalaze vodene životinje kao što su ribe, puževi, vodeni rakovi, školjke, vodeni crvi, larve insekata i dr.
Phragmites communis - trska
Na plavnim terenima su prisutne različite vrste vrba, gradeći šumarke, a uz ušće Morače prostranu, gustu vrbovu šumu. Uz vrbake su brojne zajednice konopljike.
Dublje u kopno, na par lokaliteta, nalaze se stabla endemičnog skadarskog hrasta, zaštićenog kao rijetka i ugrožena vrsta.
U šumošikarama viših položaja najčešća vrsta je belograbić. Gradi razlićite zajednice u kojima su više vrsta hrasta, nar, drača, zanovijet, jasen, zelenika, kostrika i dr.
U neposrednoj blizini NP, u Krajini, nalazi se stara, dobro očuvana šuma pitomog kestena, dok se bliže Jezeru, posebno na ostrvima, nalaze ostaci makije predstavljeni, takođe reliktnom florom, hrastom crnika i lovorom.
U vegetaciji garige i kamenjara velike površine obrasta pelim, u svijetu poznat po svojim ljekovitim svojstvima. Pored pelima, u bogatoj flori ljekovitog, medonosnog i aromatičnog bilja, zastupljeni su: vrijes, ruzmarin, vranilova trava, različite vrste mente i bosiljka, lovor, kantarion, hajdučka trava i dr.
U ovom dijelu NP i njegovog okruženja, endemičnu floru predstavljaju: srpska ramonda, žuta divlja lala, huterova divlja papričica (Zakonom zaštićene), šafrani, zanovijet, modro lasinje, svilena i dalmatinska žutilovka i dr.
U prirodi ima ljekova za mnoge bolesti.
Životinje to dobro znaju i same se liječe.
Dobro je da i vi upoznate kako priroda liječi.
